Najis tuke, Profesore Haliti

Profesoro Bajram Haliti, jekh andar najbare thaj najpoštovime romane intelektualcura ande Srbija, muljo 18. julio 2022. berš. Taro pesko ternipe dži peski meripe, posvetisarda pesko džuvdipe pire zajednicake, pokušavajindoj te koristil sa moguće mehanizmura save den o them thaj Evropska unija, te bi vazdas amari romani zajednica andar opresivno položaj thaj te predstavil la sar zajednica savi isi la potencialo, savi nikad na sas ando rati, sar progresivno narodo.

Haliti bijandilo 21. majo 1955. berš ando Gnjilane, Kosovo. Diplomirisarda po Pravno fakulteto Univerzitetosko ande Kragujevac thaj dobisarda titulo pravniko. Ando 1985. berš završisarda Jugoslovensko instituto za novinarstvo, smer novinarstvo.

Na ačhavda pesko obrazovanje ni kana reslo peske phure berša. Kerdža buti po pesko doktorato palo Roma ando Dujto svetsko rati thaj palo pravo pe reparacije. Sas maškar najlačhe džangle manuša palo romani istorija thaj pioniro ando anavdijpe amare patnjako ando Dujto svetsko rati sar „ROMOCID“. Na prihvatisarda definicije većinsko narodengo, nego kroz pažljivo analiza e terminenđi thaj prethodne anavengo, odredisarda kaj o čačo anav amare patnjako ando Dujto svetsko rati si Romocid, so značil sistematsko thaj ciljano mudaravipe e Romengo.

Nekobor puti posetisarda Indija thaj kerdža buti te Indija priznal amen sar peski dijaspora. Haliti sas čačikano manuš savo džalas te sovel thaj uštelas sa gindonenca sar politički te organizuil thaj te sačhuvel peski zajednica.

Lesko romani intereso sas upral sa aver, so potvrđuil i lesko vakaripe ando Srpsko-romano rečniko: „Te većina mangela te unapredil peski kultura thaj identitet pomoću e themesko, mora te ovel omogućime i e manjina te promovisarel pesko identitet thaj kultura pomoću e themesko.“
Bajram Haliti, „Srpsko-romano rečniko“, 2011.

Profesoro Bajram Haliti si pindžardo i andar odova kaj bi ikakvo uslov delilas pesko džanglipe terne Romane muršenge thaj Romane džuvlenge. Sikavelas amen amari istorija, kultura thaj identitet. Nikad na odbisarelas akharipe te vakerel thaj te del dialogo amenca, thaj amen nikad na džanas andar diskusija bi te siklile vareso neve. Profesoro ačhavda palo peste knjige, džanglipe thaj ideje save amen otvoreno prihvatisardam thaj pala save najisaras.

Najis tuke, Profesore Haliti.

Nagrade e Profesoreske Bajram Halitijeske

• Prvo nagrada za literarno stvaralaštvo e Romengo ando them — nagrada e predsednikoski e Italijaki.
  1. Dujto nagrada po manifestacija Amico Rom za knjiga „Romi, narod zle kobi“.
  2. Povelja Slobodan Berberski za literarno stvaralaštvo ande Srbija.
  3. Povelja za posebne zasluge thaj doprinos unapređenju kulturno-obrazovno džuvdipasko e Romengo thaj za uspehura ando razvijanje romane kulture.
  4. Povelja za mir thaj tolerancija za doprinos borbake za mir, tolerancija thaj haljovipe maškar manuša thaj narodi.
  5. Povelja za zapažime buti ando pisanje thaj afirmacija romane kulture.
  6. Diploma Joan Cioaba za integracija e Romengo ande Srbija.
• Povelja Balkansko romane federacijaki za afirmacija thaj emancipacija e Romengo po Balkan, thaj but aver.